CECAFA U-20: Abanya Eritrea batanu bamaze gutorokera muri Uganda

Muri cecafa y’abatarengeje imyaka 20 iri kubera muri Uganda abakinnyi batanu mubari baje bahagarariye ikipe y’igihugu ya Eritrea bamaze kuburirwa irengero nyuma yaho kuri uyu wa kabiri basohotse muri hotel bari bacumbitsemo hamwe n’abandi bakagenda ubutagaruka.

Nkuko byatangajwe n’abakurikiranira hafi iyi kipe bavuze ko aba bakinnyi batorotse ndetse bakaba bari no gusaba ubuhungiro muri Uganda. Igitangaje nuko iyi kipe ya Eritrea yagiye ihagarariye iki gihugu mu mimikino ya cecafa y’abatarengeje imyaka 20 yari igeze muri ½ yerekeza ku mukino wa nyuma.

Amakuru yatangajwe na Aimable Habimana ushinzwe iri rushanwa akaba yabwiye ibitangazamakuru byo muri Uganda ko aba bakinnyi ari impamo baburiwe irengero, ndetse yemeje ko baburiye muri Speke hotel bari bacumbitsemo. Nkuko byatangajwe n’ikinyamakuru the monitor Habimana yagize ati: “ubu twashyize abashinzwe umutekano hafi y’iyi kipe kugira ngo irushanwa rizarangire neza”.

Iyi kipe ya Eritrea yari yitwaye neza kuburyo bushoboka kubera kugeza ubu iri muri kimwe cya kabiri ½ ndetse kuri uyu wa gatatu ikaba ifitanye na kenya umukino wo gushaka iyerekeza ku mukino wa nyuma. Icyakora kugeza ubu abayobozi biyi kipe ntibaratangaza niba kubura kwaba bakinnyi hari ingaruka biri butere ku musaruro w’iyi kipe.

Kuri ubu umutoza asigaranye abakinnyi 14 gusa dore ko yari yazanye 19, umutoza w’iyi kipe akaba yemeje ko aba batorotse bari banarwaye bivuze ko nubundi harigihe batari kwifashishwa. Si ubwa mbere kandi ibi bibaye kuko nko muri 2013 abakinnyi ba Eritrea bagera ku icyenda (9) ndetse n’umutoza wabo batorokeye mu gihugu cya kenya, muri 2015 kandi abakinnyi 10 b’abanya Eritrea mu ikipe nkuru y’igihugu bigumiye muri Botswana bamaze gukinirayo umukino banga gusubira iwabo.

Imiryango mpuzamahanga yita ku burenganzira bwa muntu ivuga ko buri mwaka urubyiruko rubarirwa mu bihumbi ruhunga igihugu muri Eritrea ahanini biturutse ku bikorwa by’urugomo bakorerwa na leta yabo birimo no kujyanwa mu gisirikare ku ngufu, abahanga rero bahuza uku gutoroka kw’abakinnyi nibyo bikorwa.

IBITEKEREZO

SIGA IGITEKEREZO CYAWE

Your email address will not be published.


*